قصيده سيد حجاب كتبها فى التمانينات مش عارف كل لما اقرائها اجدها متجدده كما لو كانت اتكتبت النهارده و بتوصف حالتنا يعنى تشخيص المرض وتم من زمان و اعراضه مرصوده برضه من زمان و العلاج اخر سطر فى القصيده حبه تخطيط مش معقول بقى من ساعتها للان مش عارفين نعالج المرض يا ترى الخلل فين؟؟؟؟؟؟؟؟
يا مصرى ليه دنياك لخابيط...والغلب محيط
والعنكبوت عشش عل الحيط...وسرح عل الغيط
يا مصرى قوم هش الوطاويط...كفاياك تبليط
صعبه الحياه والحل بسيط...حبة تخطيط
فتحت باب إستيرادك وصرفت فوق ضعف إيرادك
حلى للخواجه إستكراد ك
سابك بتقرا فى أورادك وده أشطك ونزل تشفيط
يا مصرى ليه دنياك لخابيط...والغلب محيط
والعنكبوت عشش عل الحيط...وسرح عل الغيط
.ومهولاتى تحب تزيط ساعة الفرح زغاريط تنطيط
وفى المياتم هات يا صويت وفى المظاهرات سخن تشيط
وفى الانتخاب تنسى التصويت
يا مصرى ليه دنياك لخابيط...والغلب محيط
والعنكبوت عشش عل الحيط...وسرح عل الغيط
وليه بترشى وتتساهل وتبيع حقوقك بالساهل تستاهل النار تستاهل
ياغويط ويحسبك الجاهل ساهل وساهى وغبى وعبيط
يا مصرى ليه دنياك لخابيط...والغلب محيط
والعنكبوت عشش عل الحيط...وسرح عل الغيط
يا مصرى يا اللى الغلا عصرك والنهب فى عصرك حاصدك
قوم للحياه وأسبق عصرك ولا حاجه هاترجع مصرك
إلا أن تكون شغال ونشيط
يا مصرى ليه دنياك لخابيط...والغلب محيط
والعنكبوت عشش عل الحيط...وسرح عل الغيط
يا مصرى قوم...هش الوطاويط...كفاياك تبليط
صعبه الحياه والحل بسيط...حبة تخطيط
